LAOAG CITY – Inlawlawag ni P/Col. Frederick Obar, Provincial Director ti Ilocos Norte Police Provincial Office no apay nga immadu dagiti iwaywayatda nga Anti-Illegal Drug Buy-bust Operation ditoy probinsia.
Segun kenkuana, adu dagiti dimmalan laeng iti plea bargaining idinto a datin dagiti dadduma a subject ti kapulisan no sadinno a maibasar iti impormasionda ket nagsubli dagitoy iti panagusar iti iligal a droga.
Inbatadna a nupay adu dagiti isaysayangkatda nga Anti-Illegal Drug Buy-bust Operation ket daytoy ti pammaneknek a pursigido ken seryoso ti nailian a pulisia iti panangipatungpal kadagiti linteg ditoy pagilian.
Kunana nga ita a panawen ket saan a nadara ti pannakaipatungpal ti nasao nga operasion maidasig iti Extra Judicial Killings iti naglabas nga administrasion.
Mainaig iti daytoy, inpasingkedna nga amin nga operasion ti nailian a pulisia ket maipilpila iti Korte para iti pannakatingitingna ti kaso.
Kabayatanna, inpakaammo ti Provincial Director a dagiti kangrunaan met laeng a paggapgapoan dagiti impormasionda ket dagiti nagbalin a kadua dagiti maseknan a suspek a saandan a kayat ti agsubli iti dakes nga aramid ngem naigetda nga iberberipikar dagitoy.
