LAOAG CITY – Gutgutigoten ni Mrs. Shey Pia Abaya, mangidadaulo ti Public Employment Service Office dagiti Overseas Filipino Workers ditoy siudad ti Laoag a makipaset iti maiyuswat a BAGONG SIMULA: Financial Management and Entrepreneurship Seminar.
Segun kenkuana, maisayangkat daytoy inton Abril 15 ken 20 iti Laoag City Auditorium iti oras ti alas otso ti bigat agingga iti alas singko ti malem.
Inbatadna a daytoy a programa ket silulukat kadagiti Overseas Filipino Workers a nagawiden wenno nagsubli, manarimaan ti panagbakasionna, agdama nga addaan ti kontratana ken dadduma pay.
Inlawlawagna a dagiti interesado ket agturongda nga umuna iti Barangay Employment Service Office iti baranggayda tapno maka-avail iti slot gapu ta uppat laeng iti kada barangay ti makipartisipar iti nasao a programa.
Kunana a daytoy a programa ket gagemna a suroan dagiti Overseas Filipino Workers iti financial literacy, investment planning ken entrepreneurship tapno makaipasdekda ti bukudda a negosio a dakkel a makatulong para iti masakbayanda ken addanto ti namnamaenda no agsublida ditoy Pilipinas.
Innayonna a daytoy ket babaen iti panagkinnammayet ti City Government of Laoag babaen iti Migrant Desk Office ken ti Overseas Workers Welfare Administration.
