LAOAG CITY – Rinambakan ti Federation of Senior Citizens Association of the Phil. Ilocos Norte wenno FSCAPIN Chapter ti “elderly week”
Naiwayat ti pannakakorona ti Guwapong Lolo ken Gandang Lola ita a tawen 2024 kas maudi a paset kadagiti aktibidad iti nasao a selebrasyon.
Mainaig iti daytoy, maysa manen a taga Vintar ti nakoronaan kas Gandang Lola 2024 a ni Mrs. Jovita Gleason a kas met laeng iti napalabas a tawen a ti nakoronaan kas Gandang lola ket taga Vintar a ni Mrs. Luz Degala idinto a ti Guwapong Lolo 2024 ket maysa a taga Dingras a ni Mr. Desiderio Lagatero Sr. idinto a ni Mr. Renato Ceredon ti Guwapong Lolo 2023.
Nagbalin a kangrunaan a sangili iti nadakamat nga aktibidad ni Hon. Milagros Aquino Magsaysay, United Senior Citizens Partylist Representative.
Nangipaay met ti mensahe ni Gob. Matthew Marcos Manotoc no sadinno impadanonna ti napalaos a panagyamanna iti panangawis kenkuana dagiti senior citizen iti nasao a selebrasyon.
Inpanakkel met ti gobernador a maysa ti Ilocos Norte iti intero a pagilian a pakasarakan kadagiti kapapautan iti panagbiag a Filipino ken kaaddoan ti nataengan.
Mainaig iti daytoy, inbunannag ti gobernador a masapul a maipaayan ti naan-anay a pannakaasikaso dagiti senior citizen.
Kagiddan daytoy, binigbigna ti kinaaktibo dagiti nataengan ditoy probinsia a kanayon a makiparpartisipar kadagiti nagduduma nga aktibidad.
Naragsakan dagiti senior citizen iti inrakurakna a tarigagay nga adda dagiti mangibagi kadagiti senior citizens kadagiti amin a “legislative government bodies” ditoy probinsia.
Innayonna a kas gobernador ti Ilocos Norte ket aramidenna ti amin a kabaelanna a mangipasigurado iti pannakatagiben ti salun-at dagiti senior citizen ken agtultuloy ti panagbalin dagitoy nga aktibo ken ti pannakaipaay kadakuada ti gundaway a makipaset kadagiti aktibidad ti probinsia.
