LAOAG CITY – Inbilin ni Presidente Ferdinand Marcos Jr. ti Department of Energy (DOE) iti babaen ti Philippine National Oil Company (PNOC) a gumatang ti 318 milyon a litro wenno 2 milyon a bariles ti krudo manipud kadagiti sabali a pagilian.
Inbatad ni Department of Energy Sec. Sharon Garin iti press briefing iti Malakanyang, daytoy ket tapno nayon iti energy supply ti Pilipinas.
Kunana a ti 165 milyon a litro ti langis iti 318 milyon a pakabuklan a litro ket manamnama a sumangpet nga insigida iti pagilian manipud idiay Malaysia, Singapore, India ken Oman.
Gapu iti daytoy, inalay-ayan ti sekretario ti panagdanag ti publiko a maibusan ti krudo ti Pilipinas gapu iti gubat iti Middle East.
Inpetteng ni Garin, uray awan pay ti UPLIFT committee ket inbilinen ti Presidente a gumatang ti Philippine National Oil Company ti bukud a supply tapno manayonan ti supply ti oil companies ti pagilian.
Malaksid iti daytoy, kunana nga agtultuloy ti pannakisarsarita ti gobierno kadagiti dadduma pay a pagilian tapno makagatang ti nayon a pagalaan ti crude oil nga imbes a mangnamnama laeng iti Middle East wenno iti Strait of Hormuz.
Inlawlawag ni Garin a ti 50 nga aldaw nga oil reserve ket saan a kayatna a saoen a maibus daytoyen iti uneg ti 50 nga aldaw no diket manayonan daytoy apaman a sumangpet iti pagilian dagiti dadduma pay.
