LAOAG CITY – Pormalen nga inawat ti Pilipinas ti donasyon manipod iti gobyerno ti United Arab Emirates para kadagiti biktima ti super typhoon Carina ken epekto ti abagat.
Naamoan a dagiti donasyon ket bukbuklen ti gatas, arina, bagas ken dadduma pay.
Naiyuswat ti turnover ceremony iti Ninoy Aquino International Airport nga inatendaran da Ma. Anna Kathryna Yu-Pimentel, Special Envoy to the United Arab Emirates for Trade and Investments, Department of Social Welfare and Development Sec. Rex Gatchalian, Interior Secretary Benjamin Abalos Jr., United Arab Emirates Ambassador Mohamed Obaid Alqattam, ken Reichel Quiñones, Chief of Presidential Protocol and Presidential Assistant on Foreign Affairs.
Nagyaman ni Yu-Pimentel iti gobyerno ti United Arab Emirates, partikular ken ni Sheikh Mohamed bin Zayed Al Nahyan, Presidente ti United Arab Emirates; Sheikh Abdullah bin Zayed bin Sultan Al Nahyan, Minister of Foreign Affairs, Deputy Prime Minister; ken ni Ambassador Alqattan.
Kabayatanna, iti kaudian a datos ti National Disaster Risk Reduction and Management Council (NDRRMC) ket adda ti 3,628,500 nga indibidwal wenno 971,667 a pamilya ti naapektaran ti Bagyo Carina, tropical depression Butchoy, ken ti abagat.
