LAOAG CITY – Nagkiddaw ti Philippine National Police-Anti-Cybercrime Group (PNP-ACG) kadagiti mammanday-linteg a balbaliwan iti SIM Card Registration Act.
Segun kenni PNP-ACG director Maj. Gen. Wilson Casil Asueta, kaaduanna a kaso ti cybercrime ditoy pagilian ket mainaig pay laeng kadagiti subscriber identity modules wenno SIM cards.
Saan nga epektibo ti nadakamat a linteg isu a napateg a mangipasa dagiti mammanday-linteg iti napigpigsa a bersion daytoy.
Sumagmamano kadagiti pagarigan nga inpaay dagiti police officials ket pakairamanan ti panagusar iti SIM card ket ti panagkusit, panagsugal iti online ken pananggundaway iti pakabigbigan.
Kinunana nga iti agdama a linteg, marigatanda a mang-monitor gapu iti adu a kurang a probision a pakairamanan ti SIM Card Registration Act.
Sumagmamano kadagiti ikidkiddaw ti PNP-ACG ket ti identity authentication ken activation dagiti SIM card kalpasan laeng ti authentication ken registration.
