LAOAG CITY – Inlawlawag ni Police Lt. Bjay Calivoso, ti deputy chief of police ti PNP-Bacarra a nakasagana da no bilang man maipatungpal ti Modified Enhanced Community Quarantine (MECQ) iti ili da.
Daytoy ket manaig iti rakurak ni Gov. Matthew Marcos Manotoc a maipan iti babaen ti MECQ ti nadakamat nga ili gapo iti panagngato ti kaso ti covid-19 kalpasan nga inrekomendar daytoy ni Mayor Fritzie dela Cruz-Gapasin.
Segun kenni Calivoso, adda met dagiti plano dan para iti pannakaestbalisar ti border checkpoint apaman nga aprubaran ti gobernador ti pannakaimplementar ti naig-iget a quarantine status iti Bacarra.
Mainaig iti daytoy, kuna ni Calivoso nga idi rabii ket nai-lift metten ti pannakailockdown ti Barangay 6 iti nadakamat nga ili idinto a dagiti dadduma pay a barangay ket addaan ti sumagmamano a nakalockdown a sitio.
Naamoan a bayat ti panagpatrolya dagiti otoridad ket addan ti agarop 50 nga indibidual dagiti natiliw a naglabsing iti health protocols kas iti saan a panagisuot ti facemask ken saan a panangobserbar iti social distancing.
Kabayatanna, pinalagipan manen ni Calivoso dagiti kailyan na a sumurot kadagiti minimum health protocols tapno maliklikan ti ad-adda a panagwaras ti covid-19.
