LAOAG CITY – Inbatad ti Department of Social Welfare and Development a ti pondo da para iti cash assistance wenno ayuda para ti sektor ti transportasion ket umanay paylaeng agingga intono Hulyo ita a tawen.
Iti Senate Committee on Social Justice, Welfare, and Rural Development hearing, sinaludsud ni Panel Chairperson Senador Erwin Tulfo kadagiti opisyales ti DSWD maipanggep iti pondo da iti baet ti agtultuloy a krisis ti langis.
Insungbat ni DSWD Undersecretary Aliah Dimaporo a mabalin a makaumanay paylaeng ti pondo da agingga iti Hunio ken Hulio ita a tawen.
Innayon na a ti cash relief para kadagiti driver ti public utility vehicle (PUV) ket maysa a short-term a wagas.
Basar pay ken ni Dimaporo, ti agdama nga us-usaren da a pondo ket AICS (Assistance to Individuals in Crisis Situations) tapno masolusyunan ti krisis ti gasolina, ngem inadmitir na nga adda dagiti regular a programa da a naapektaran kas ti medikal, burial ken dadduma pay a financial assistance programs.
Innayon na a no maibus ti pondo da ket kiddawen da ti pannakailatang manen ti pondo para kadagiti nasao a programa ti ahensya.
