LAOAG CITY – Suportado ni Mr. Froilander Agdeppa, Presidente ti Discolandia Owners Managers Association iti Barangay 1 ditoy ciudad ti Laoag ti aniaman nga agbalin a desisyon mainaig iti pannakaipatungpal ti liquor ban ditoy probinsya.
Nupay kasta, inbatad na nga adda met ti makitkita na a madi nga epekto ti liquor ban gapu ta adu dagiti turista ken investors a bumisbisita ditoy probinsya ken ciudad.
Gagem na nga adda ti maangay a hearing seknan ti nasao a gakat tapno maipakaammo ti kayat da nga ipadanon seknan iti daytoy.
Inlawlawag na a saan na unay a makitkita a problema ti desgrasya babaen iti panaginom ti arak gapu ta manmano laeng kadagiti natataengan ti mapmapan a mairamanan iti insidente ken kangrunaan kadagitoy ket ububing.
Kunana a dakkel ti agbalin nga epekto nu maipatungpal ti liquor ban gapu ta posible nga agserra dagiti sumagmamano nga establisyimento nga aglaklako ti arak.
Innayon na nga nadagsen kenkuana ti oras a naikeddeng ti panaglako ti arak gapu ta sa laeng aglukat ti negosyo da iti alas-nuebe ti rabii.
