LAOAG CITY – Mangrugi a maipatungpal intono bigat, disyembre 3 ti regulated a presyo ti karne ti baboy iti ili ti Paoay.
Ti regulated a presyo ti karne ti baboy ket naipalaon iti Municipal Ordinance No. 2021-010.
Basar iti ordinansa, ti kada kilo a lasag ti baboy ket 240 a pisos; dalem (210 a pisos iti kada kilo); ribs ken maskara (200 a pisos iti kada kilo); tultulang (190 a pisos iti kada kilo) ken ti bagis (130 a pisos iti kada kilo).
Malaksid iti presyo ti karne ti baboy ket naregulate pay ti presyo dagiti sibibiag a baboy no sadinno a ti live weight nga agdagsen iti 80-agpangato a kilos ket 145 a pisos iti kada kilo idinto a ti agdagsen ti 60-79 a kilos ket mailako ti 140 iti kada kilo.
Inpasigurado ni Mrs. Adella Rebolledo, ti municipal treasurer iti ili ti Paoay a ti ordinansa nga inpasa ti konseho iti nasao nga ili a nakaipalaunan ti regulated prize ti karne ti baboy ken ti live weight ket inrebisar ken inaprubaran ti sang panlalawigan.
Nagballaag pay ni Rebolledo kadagiti saan a mangsurot iti regulated prize ti nasao a produkto nga adda ti maipataw a maiyannatop a pannusa kontra kadagitoy.
Kabayatanna, inpakaaammo ni Rebolledo a mabalin nga agawat ti nasao nga ili kadagiti baboy nga aggapo iti sabali a lugar basta African Swine Fever (ASF) free, ngem kuna na a maipawil ti agparuwar ti baboy manipod iti ili ti Paoay.
