LAOAG CITY – Inlawlawag ni Atty. Charito Malicad, City Tourism Officer ditoy siudad ti Laoag a saan a nagkurang ti plano iti opisinada iti pannakaisayangkat ti Panagyaman Concert kas paset ti panangrambak ti Pamulinawen Festival.
Daytoy ket kalpasan a rumrummuar a maipagarup a kurang ti plano ti City Tourism Office iti pannakaiyuswat iti nasao a programa.
Segun ken ni Atty. Malicad, saanna a maawatan no apay adda dagiti maibatbato kadakuada a negatibo a komento ket inaramidda met ti amin tapno madalosan dagiti nagkaiwara a basura manipud iti Aurora Park agingga iti Kapitolio Probinsial.
Inbatadna a saan a maliklikan ti posible nga adda ti kapada manen a mapasamak ngem inpasingkedna nga adda dagiti street sweepers manipud iti lokal a gobierno a naka-standby tapno insigida a maakop dagitoy ken maikabil iti umiso a pagbasuraan.
Kabayatanna, kuna ti City Tourism Officer a nasaysayaat a kinasarita isuna nga umuna ni Mr. Aianree Raquel, Provincial Tourism Officer maipanggep iti nasao a banag saan ket di nga inrakurakna daytoy babaen ti panag-post-na iti online.
