LAOAG CITY – Adda ti sabali manen nga engkwentro a napasamak iti nagbaetan ti Philippine Army ken New People’s Army iti Barangay Sto. Niño iti ili ti Nueva Era.
Segun ken ni P/Maj. Sheryl Guzman, pannakangiwat ti Ilocos Norte Police Provincial Office, adda ti pito a kameng ti makakannigid a grupo ti nakarinnupak ti tropa ti gobierno a 77th Infantry Battalion.
Inbatadna a nagpaot ti engkwentro ti dua a grupo iti uneg ti tallo a minuto.
Inlawlawagna a dagiti maseknan a grupo ti rebelde ket miembro ti Platoon Uno ti Ilocos Cordillera Regional Committee a nakarinnupak ti Philippine Army iti kallabes iti Barangay Poblacion iti ili ti Nueva Era.
Mainaig iti daytoy, nangiwayat dagiti otoridad ti combat operation iti Barangay Sto. Niño iti ili ti Nueva Era.
Naammoan nga adda ti Checkpoint Border iti Nueva Era Eco Park tapno maipasigurado ti kinatalged dagiti umili iti lugar.
Maipalagip nga inpakaammo ni Major Bryan Albano, Civil Military Operations Officer ti 501st Infantry Valiant Brigade ti Philippine Army nga agarup 15 agingga 20 nga indibidual a kameng ti New People’s Army ti naka-engkwentro ti Philippine Army iti Barangay Poblacion iti ili ti Nueva Era iti kallabes.
