LAOAG CITY – Inrakurak ni Dr. Rodrigo Catcatan, mangidadaulo ti City Health Office iti agtultuloy nga screening para iti Human Immunodeficiency Virus ditoy siudad ti Laoag.
Segun kenkuana, ti kangrunaan dumalan iti screening ket dagiti amin nga empleado ti lokal a gobierno ditoy siudad pakairamanan dagiti maduktalanda a nagpositibo iti tuberculosis.
Inbatadna nga iti napalabas a tawen ket adda ti maysa a kaso ti Human Immunodeficiency Virus ditoy siudad ngem saan a residente ditoy rason a pinagawidda iti bukudna a lugar.
Mainaig iti daytoy, nagpanawagan ni Dr. Catcatan kadagiti addaan ti nasao a sakit a saanda nga agdudua ken agbuteng a mapan iti opisinada gapu ta libre ti maipaay kadakuada nga agas ken confidential ti pakabigbiganda.
Kabayatanna, agtultuloy nga ar-aramiden ti nadakamat nga opisina ti makibinnulig iti Mariano Marcos Memorial Hospital and Medical Center iti siudad ti Batac para iti Info Education Campaign tapno maballaagan ti publiko no kasano a maala, malapdan ken maitrato a normal dagiti tao a positibo iti Human Immunodeficiency Virus.
