LAOAG CITY – Inrakurak ni Senator Bong Go ti panagsanod na iti panagkandidato kas presidente iti Eleksyon 2022.
Daytoy ket makalawas kalpasan ti panangadmitir na nga agur-uray pay laeng ti senyales manipud iti Namarsua no ituloy na wenno saan ti panagkandidato.
Inbatad ni Go ti panagsanod na kabayatan ti seremonya iti Bonifacio Day iti Pinaglabanan Shrine idiay San Juan City.
Inlawlawag ni Go a saan a pabor ti pamilya na iti panagpaidasig na iti kangatoan a posisyon ti gobierno.
Malaksid iti daytoy, kunana a saan na a kayat a maipit ni Presidente Rodrigo Duterte.
Kunana a kadagiti naglabas nga aldaw, nautob na kontra ti aksyon na iti ibagbaga ti puso ken paununot na.
Kabayatanna, inbatad ni Go kadagiti presidential aspirant nga iprayoridad ti welfare ti pagilyan ken ti interest of the Filipinos.
Maipalagip a sakbay a naelektaran kas Senador idi 2019, nagserbi daytoy kas special assistant ni Duterte.
