LAOAG CITY – Binabalaw ni Senador Ronald “Bato” Dela Rosa ti Philippine National Police gapu ta saanda pay a nabirukan ni Kingdom of Jesus Christ (KOJC) leader Pastor Apollo Quiboloy iti baet a dua a lawasen a banbantayanda ti Kingdom of Jesus Christ compound idiay Davao City.
Dinakamat ni Dela Rosa ti inaramid ti Indonesian National Police a dagusda a nakita dagiti tattao a birbiruken ti gobierno ti Pilipinas nupay saanen nga innagananna ni dati a Bamban Mayor Alice Guo a naarestar idiay Indonesia.
Inbatad ni Dela Rosa, dati nga hepe ti Philippine National Police sakbay a nagbalin a Senador a ti panagkitana ita dagiti tattao ket adda ti panagkurang ti Philippine National Police.
Indauloan ni Dela Rosa ti imbestigasion ti Senate subcommittee on justice and human rights iti operasion ti Philippine National Police iti Kingdom of Jesus Christ compound idiay Davao City.
Maipalagip nga iti maysa a privilege speech ni Dela Rosa, binabalawna ti panangi-deploy kadagiti dua a ribu a pulis iti Kingdom of Jesus Christ compound tapno iserbi ti arrest warrant ni Quiboloy.
