LAOAG CITY – Nakasagana ni Senate President pro-tempore Ping Lacson a tulungan ni Senador Ronald “Bato” dela Rosa no kasano a sangoen ti kaso no bilang adda ti arrest warrant ti Senador manipud iti International Criminal Court (ICC).
Inbatad ni Lacson, kas dati nga agkadua ken comrade iti Philippine National Police (PNP) isut gapuna a tulunganna ni Dela Rosa.
Kunana a ti maysa kadagiti maitulongna ken ni Dela Rosa ket ti nagbalin a personal a kapadasanna iti Dacer-Corbito Case idi Nobiembre 2000.
Kalikagumna nga iburay ken ni Dela Rosa no ania dagiti addang a mabalin nga aramiden wenno kasano a sangoen ti kaso a maiyataday latta iti linteg ken pagannurotan ti international tribunal.
Dinakamat ni Lacson a kumplikado ti kaso ni Dela Rosa a sumangsango iti International Criminal Court gapu ta saan a makaipila ti pleadings a mabalin a mangpa-dismiss iti kaso kas kenkuana.
