LAOAG CITY – Inpetteng ni Senador Rodante Marcoleta a na-misinterpret ti rakurak na maipanggep iti Kalayaan Island Group ken Exclusive Economic Zone ti pagilian.
Inlawlawag na a ti naibaga na a “give up” ket mangdakdakamat laeng iti mapping wenno panangbukel ti mapa, ken saan nga iti aktwal a panangtagikua kadagiti isla.
Kuna na a gagem na laeng a maaddaan ti legal a pagibasaran iti panangideklarar iti West Philippine Sea.
Bwineltaan met ni Marcoleta dagiti kritiko na a mangak-akusar kenkuana iti panagbalin a traydor no sadinno nga inpetteng ti senador a ti pudno a traydor ket saan a mangipapaay ti palawag iti claims ti Pilipinas.
Kabayatanna, plano dagiti residente ti Kalayaan Island Group ti agpila ti resolusyon iti Sangguniang Pambayan iti Palawan tapno ikkaten iti rekord ti senado ti rakurak ni Marcoleta.
Segun ken ni Vice Mayor MP Albayda, nasaktan da unay iti naibaga ti senador aglalo kadagiti kailian da nga agib-ibtor ti ado a sakripisyo tapno mapagtalinaed da dagiti isla da.
