LAOAG CITY – Inpetteng ken desidido latta ni Senate Minority Leader Koko Pimentel nga ituloy ti panangallukoyna ken ni Senate President Chiz Escudero nga agpaawag ti caucus kadagiti Senador tapno mapagnunumoan ti impeachment case ni Vice President Sara Duterte.
Daytoy ket iti laksid a nagtalinaed ti takder ni Escudero a saanda a mabalin a mangisayangkat ti Senate special session iti baet ti session break ken kasapulanda nga agbalin a naannad kadagiti addang tapno saan a makwestionaran ti kampo ni Duterte.
Inbatad ni Pimentel, itultuloyna latta ti “all senators caucus” ken ipaganetgetna ti takderna iti impeachment ti Bise Presidente.
Immunan nga inrakurak ti Senate Minority Leader a ti singasingna ket maibasar laeng iti naiwayat a panagadal iti Konstitusion ken iti Senate impeachment rules.
Inlawlawagna nga adda ti constitutional duty dagiti Senador nga iyalisto ti impeachment case babaen ti panangisayangkatda ti special session uray saan a ti Presidente ti agpaawag iti daytoy gapu ta isuda ket agserserbi a kas maysa a korte ken saan a kas legislative body.
