LAOAG CITY – Maalarma ni Senate Majority Leader Francis ‘Tol’ Tolentino iti agtultuloy a panagngato ti presio dagiti nateng kangrunaanna iti laya.
Binabalaw ti Senador ti presio ti laya a ngimmato agingga iti P320 iti kada kilo idi Lunes.
Ti kaudian a panagngatona ket dimmanon iti average a P100 iti kada kilo gapu ta nadakamatna a ti laya ket mailaklako iti sumurok-kumurang a P220 iti napalanas a lawas.
Gapu iti daytoy, kalikagum ni Tolentino a tingitingen ti Bureau of Plant Industry ti Department of Agriculture ti ramot iti panagngato ti presio ti laya a maysa a napateg ken kangrunaan a ramen para kadagiti Pilipino.
Kabayatanna, nakaragsakan ti Senador ti panangipatungpal ti price freeze tapno protektaran dagiti aggatgatang kadagiti maseknan a lugar a naapektaran ti panagbettak ti Mount Kanlaon idiay Negros Island.
Maipalagip nga immunan a ginutigot ni Tolentino ti Department of Trade and Industry a mangipatungpal ti price freeze kadagiti kangrunaan a magatgatang iti kangitingitan ti epekto ti El Niño phenomenon.
