LAOAG CITY – Inrakurak ni Senador Sherwin Gatchalian a ti Senate Proactive Response and Oversight for Timely and Effective Crisis Strategy (PROTECT) Committee ket agsagsagana ti interim report pakairamanan ti rekomendasion tapno masolbar ti parikot iti suplay ti langis iti pagilian gapu iti agdama a krisis iti Middle East.
Maysa kadagiti kangrunaan a rekomendasion nga ilunglungalong ti panel ket ti panagusar ti government-to-government (G2G) negotiations tapno makaala ti nayon a fuel supply.
Inbatad ni Gatchalian, napateg nga usaren ti gobierno ti pannakikoordinar daytoy kadagiti dadduma a pagilian tapno mapaalisto ti panagserrek ti nayon a suplay.
Iti baet nga awan pay ti opisial a sungbat manipud iti executive branch, nadakamat ni Gatchalian ti sumagmamano a bassit a shipments manipud iti Russia ken Japan nga umdas laeng para iti dua agingga iti sumagmamano nga aldaw.
Inpettengna a kasapulan a papigsaen ti negosasion iti nangatngato a tukad wenno nangatngato iti mid-level engagements.
