LAOAG CITY – Natay ti maysa a senior citizen kalpasan a nalmes iti karayan iti Brgy. 3 iti ili a Piddig.
Nabigbig ti biktima a ni Domingo Esteban, 62, awanan asawa, mannalon ken residente iti nasao a barangay.
Basar iti imbestigasyon ti PNP Piddig, nakita ni Juanita Padaca ti bangkay ni Esteban nga agtatapaw iti nasao a karayan ngem naideklara a dead on arrival.
Naamoan a napan laeng kinita ni Esteban dagiti pagay na sakbay a nakita ti bangkay na.
Kabayatanna, napukaw ti balanse ti lakay a rason ti pannakalmes ti lakay a nangitunda ti pannakatay na basar iti pakpakauna nga imbestigasyon dagiti kameng ti pannakabagi ti linteg iti nasao nga ili.
Basar iti PNP, inaldaw nga agehersisyo ni Esteban babaen ti panagpagna-pagna na iti dike iti nasao a karayan.
Naamoan a ginandar na ti bimmalasiw iti karayan ket maipagarup a napukaw ti balanse na bayat iti panangala na ti tsinelas na a naiyanod.
Rumrumwar a napigsa ti ayus ti danum iti nasao a karayan ken adda dagiti paset na a nauneg nga umabot pay iti siket ti kaadalem na.
