LAOAG CITY – Natay ti maysa nga SK kagawad gapu iti maipagarop a sakit a dengue idiay Barangay Quiom iti ciudad ti Batac.
Binigbig ni Barangay Chairman Romeo Campilya ti Barangay Quiom iti nasao a ciudad ti biktima a ni Richie Morales, agtawen ti 19, 2nd year college iti Mariano Marcos State University (MMSU) ken residente met laeng iti nasao a barangay.
Iti eksklusibo nga interview ti Bombo Radyo Laoag ken ni Campilya, inbatad na a ti biktima ket ad-adda nga agnanaed iti Barangay Tabug gapu ta as-asideg iti nasao nga unibersidad a pages-eskwelaan na.
Nupay kasta, idi biernes ket naamoan ti ina ti biktima nga aggurigor isut gapuna a napan na inyawid iti balayda ngem gapu ta makita da a kumarkaro ti kondisyon ti SK kagawad ket napanda inpan iti Mariano Marcos Memorial Hospital and Medical Center iti ciudad ti Batac idi lunes, ngem idi kalman ket nadamag na a natayen.
Inpakaammo ni Kampilya a nakapsot ti resistensya ti balasang gapu ta adda ti sigud na a sakit a panagdanom ti bara na.
Saan a makumpirmaran ti kapitan no naka-kagatan ti biktima ti lamok a carrier ti sakit a dengue.
Masayangan unay ni Campilya gapu ta uray agad-adal ni Morales ket nagtalinaed latta nga aktibo kadagiti aktibidad iti barangay da ken ti ina na a ni Mrs. Delia Morales ket maysa pay a Barangay Health Worker (BHW).
Malaksid ti SK kagawad ket adda pay ti maysa a residente iti nasao a barangay a biktima ti sakit a dengue ngem saanen a nakaipaay ti naan-anay a detalye wenno impormasyon ti nasao a kapitan.
Kabayatanna, immapela ni Barangay Chairman kadagiti kalugaran na a masapol nga ugalien da ti agdaldalos iti uneg ken ruwar ti barangay da.
Innayon na nga awan ti sabali a maitulong na kadagiti kabarangayan na no saan a ti mangbalakad kadakuada a masapol a kanayun da nga agdalos kangrunaan na dagiti ammo da a mabalin a pagumukan dagiti lamok a carrier ti sakit a dengue.
