LAOAG CITY – Nagtalinaed nga epektibo ti state of calamity ditoy Ilocos Norte a naideklarar kalpasan ti iduduprak ti Bagyo Julian.
Daytoy ti inlawlawag ni Hon. Rafael Chua Medina, presiding officer ti Sangguniang Panlalawigan kabayatan ti regular session.
Immuna iti daytoy, nadamag kenkuana ti rason no apay a saan dagitoy a a nangideklerar ti state of calamity iti baet ti nakana a perdisyon a gubuay ti Bagyo Marce.
Inbatadna a saan pay nga inbabawi ti Sangguniang Panlalawigan ti deklarasyon ti state of calamity rason a mabalin pay laeng nga usaren ti probinsia pakairamanan dagiti siudad ken munisipio ditoy Ilocos Norte ti DRRM wenno calamity fund.
Kagiddaan daytoy, inpadanonna ti panagyamanna iti iyuumay ni Pres. Ferdinand R. Marcos Jr. ditoy probinsia ken ti panangbigbigna iti kasapulan ti probinsia ken dagiti dadduma pay a probinsia gapu iti dinuprak ti Bagyo Marce.
Inpalgakna nga inpasada iti Sangguniang Panlalawigan ti resolusyon a mangipaay ti bileg ken ni Gob. Matthew Marcos Manotoc a mangawat iti limapulo a milyon a pisos manipud iti opisina ti presidente.
Kunana a nakaawat pay dagiti nagduduma a lokal a gobiern ditoy probinsia ti pundo ken kadakkelan ti naawat ket ti lokal a gobierno iti ili ti Pagudpud gapu iti nagbalin nga epekto ti bagyo.
Inlawlawagna, nasken a makita a naimbag no asino dagiti naapektaran a rumbeng a maipaayan ti naan-anay a tulong manipud iti pundo nga inpaay ti opisina ti presidente.
Mamati ni Medina a dagiti maipangpangruna a sector a pakausaran ti nasao a pundo ket dagiti mannalon ken mangngalap a naapektaran dagiti pamastrekanda a pangsuporta iti pamiliada.
