LAOAG CITY – Inrakurak ni P/Col. Frederick Obar, Provincial Director ti Ilocos Norte Police Provincial Office nga adda latta dagiti sumagmamano a drug surrenderee ditoy probinsia nga agsubsubli iti iligal a droga.
Segun kenkuana, basar iti assessment-da ket gungundawayan dagiti indibidual iti panagbalinna kas maysa a drug surrenderee.
Inbatadna a babaen iti daytoy ket nalimed nga adda ti ar-aramidenda a maikanniwas iti paglintegan.
Mainaig iti daytoy, inpakaammo ni Obar nga adda ti isaysayangkatda a monitoring kadagiti indibidual nga adda ti pakainaiganna iti iligal a droga.
Inlawlawagna a sumagmamano kadagiti drug surrenderee ket saan a pudno a nagbalbaliw no di ket ad-adda pay a nagsubli dagitoy iti dakes nga aramid.
Nupay kasta, kunana a dakkel a katinnulunganda dagiti met drug surrenderee a naminpinsan a nagbalbaliw no sadinno dagitoy ti mangipapay ti naan-anay nga impormasion kadagiti iwaywayatda nga operasion.
Innayonna nga adda pay dagiti drug addict a naipadalan iti rehabilitation ngem nagsubli met latta dagitoy iti iligal nga aktibidad.
