LAOAG CITY – Inbatad ni Energy Secretary Sharon Garin nga addan ti sumagmamano a Philippine-flagged ship ti nakastrek iti Strait of Hormuz kalpasan nga inpasingked ti Iran ti natalged nga idadalyasat da iti nadakamat a lugar.
Inlawlawag ni Garin nga uray nakastreken dagiti barko ket saan a langis ti karga dagitoy no di ket sabali a produkto kas ti petrochemical.
Nupay kasta, inpaganetget ti opisial ti kinapateg ti pannakibinnulig ni Foreign Affairs Secretary Theresa Lazaro iti Iranian counterpart-na.
Segun ken ni Garin, saan laeng a dagiti tanker wenno barko ti pagilian ti maikkan iti clearance no di ket uray dagiti produkto nga awan kadagiti barko dagiti Pilipino ngem naituding a maipatulod iti Pilipinas.
