LAOAG CITY – Madanagan dagiti sumagmamano a residente iti Barangay San Marcos iti ili ti San Nicolas iti posible a pannakaiyanod dagiti pagtaenganda gapu iti saan pay a nalpas a flood control project ti Department of Public Works and Highways.
Segun ken ni Mrs. Aida Labutong, maysa kadagiti residente iti nasao a barangay, maam-amakda gapu ta dandanin a dumanon ti danum kadagiti pagtaenganda nangruna no adda ti napigsa a tudo wenno bagyo a dumuprak.
Inbatadna a masapul a saanda nga ibaybayag gapu ta adu a residente ti maapektaran ken maikabil iti risgo dagiti biagda gapu iti mapasaran a panaglayos.
Mainaig iti daytoy, inpakaammo ni Barangay Chairman Federico Simpliciano nga idi pay napalabas a tawen a nangrugi iti pannakaipatungpal ti nasao a flood control project iti Nangabungan Creek ngem arig karugrugida pay laeng.
Inlawlawagna nga adda ti lima agingga walo laeng a construction worker ti agtrabtrabaho iti nadakamat a karayan isu a nabayag a malpas ti proyekto.
Kunana nga inkari ti Department of Public Works and Highways a malpas ti flood control project inton bulan ti Septiembre ngem para kadakuada ket narigat daytoy a mapasamak gapu ta adu pay ti maubra.
Kabayatanna, iti panagturong ti Bombo Radyo Laoag News Team ket naduktalan a ti contractor ti flood control project ket ti Megapolitan Builders and Construction Supply no sadinno a dumanon iti sumurok 104 a milyon a pisos ti nailatang a pundo.
