LAOAG CITY – Manamnama a sumango iti kaso a frustrated homicide ti suspek iti napasamak a panagtagtagbat iti Barangay 7 iti ili ti San Nicolas.
Daytoy ti inbatad ni Police Capt. Ashley Cacayorin, ti deputy chief of police iti ili ti San Nicolas.
Binigbig ni Cacayorin ti biktima a ni Warren Batacan, agtawen ti 30 idinto a ti suspek ket ni Franco Bastong, agtawen ti 39, agpada dagitoy a residente iti nadakamat a barangay.
Inbatad ni Cacayorin a basar iti imbestigasyon da, napan ti biktima iti balay ti uliteg na a ni Fernando Batacan ken kinomprontar na daytoy.
Kuna na nga idi nangngeg ti suspek ti panagrirriri dagiti dua ket napan naganawa ngem isunan ti nangibaw-ingan ti biktima ti pungtot na ken nadangran na daytoy.
Kalpasan a nadangran ti biktima ti suspek ket simrek a dagus iti balay da ngem rimuar metlaeng no sadinno a ditoyen a maipagarop a tinagbat ti suspek iti namindua a daras partikular iti abaga ken tumeng na.
Inpakaammo ni Cacayorin a naitaray ti biktima iti Mariano Marcos Memorial Hospital and Medical Center iti ciudad ti Batac ken iti agdama ket addan iti natalged a kasasaad.
Segun pay ken ni Cacayorin, desidido ti pamilya ti biktima nga agpila ti reklamo kontra iti suspek no sadinno a malaksid iti frustrated homicide ket kitkitaen da pay no mabalin da a pilaan ti panaglabsing iti Omnibus Election Code gapu iti inusar na a patadem.
Naamoan a ti kadendenna ti biktima ket kabsat ti suspek.
Kabayatanna, inpalgak ni Cacayorin a basar iti nakalap da nga impormasyon ket masansan a mapan mangriribok ti biktima kadagiti kakabsat na kangrunaan na no daytoy ket nabartek.
