LAOAG CITY – Inistorya ni Zenaida dela Cruz iti Barangay Suyo iti ili ti Dingras no kasano a maipagarop a dinangran dagiti tallo a kameng ti PNP ti live in partner na a ni Mc Donnard Saludares.
Segun kenni dela Cruz, napan da nakimitay iti asawa na iti met laeng barangay da ngem pinauna isuna ni Saludares a nagawid.
Nupay kasta, saan na a napasangpet ni Saludares iti balay da isut gapo na a napan iti nagminitay ken iti panagdamdamag na ket naibaga ti batch na nga adda iti police station daytoy ngem saan na nga ammo ti rason.
Gapo iti daytoy, napan na inpakammo kadagiti kabagyan ni Saludares iti Barangay Albano iti nasao met laeng nga ili ken nagturong da iti kwerpo ti pulisya.
Kuna a ditoy a nakabalod ni Saludares nga agkakapsot ken adda ti dakkel a dugol iti panga na ngem saan na nga inbaga kenkuana ti rason no diket nagpaala ti arwaten na.
Inbatad na nga iti panagsubli na iti istasyon ti PNP-Dingras ket kuna ni Saludares nga ikabil da iti ospital gapo ta agkakapsot, saan a makaanges ken nasipnget ti panagkita na.
Inlawlawag na nga idi adda da iti Dingras District Hospital ket naduktalan nga ado ti litem iti nagduduma a paset ti bagi na ken adda ti rimwar a dara iti dua a lapaayag na isut gapo na a nairekomendar a maiyakar iti Mariano Marcos Memorial Hopital and Medical Center iti ciudad ti Batac.
Mainaig iti daytoy, kuna ni dela Cruz a ti dimmanon kenkuana a damag ket maipagarop a nagprobokar ni Saludares iti minatayan, adda ti kinabil na nga agtutubo ken tinagbat na ti lamisaan ti barangay.
Binigbig ni dela Cruz dagiti tallo a pulis a maipagarop a nangdangran kenni Saludares nga isuda Police Master Sergeant Nixon Rivera, Police Corporal Charlie Oliver Corpuz ken Patrolman Arnel Lao, agpapada a kameng ti PNP-Dingras.
Inpetteng ni dela Cruz a no pudno man a nagprobokar ti live in partner na ket saan latta a rumbeng a madangran daytoy ken awan met ti mangpaneknek nga inaramid daytoy ni Saludares, ken iti panagdamag na iti nagminatay ket awan met ti napaspasamak a gulo.
Naamoan nga idi nagdamag manen ni dela Cruz kenni Saludares ket naibaga daytoy a dagiti pulis ti maipagarop a nangkabkabil kenkuana.
Inakusaran pay ni dela Cruz a maipagarop a paltog ti naipang-or iti ulo ni Saludares ken kunana a dagiti pulis ket aggi-inom iti minatayan a nakauniporme.
Mainaig iti daytoy, kuna ni dela Cruz nga inlawlawag kadakuada dagiti pulis a limmaban ni Saludares ken immuli iti pader ngem naregreg nga isu ti nakaalan na kadagiti sugat na.
Kabayatanna, nangipila da dela Cruz ti kaso administratibo kontra kadagiti tallo a nadakamat a pulis.
