LAOAG CITY – Nakairekord ti Ilocos Norte Police Provincial Office ti tallo a suicide incidents iti las-od laeng ti maysa nga aldaw iti nagduduma nga ili ditoy probinsya.
Umuna ket ti napasamak a suicide incident iti ili ti San Nicolas a ti biktima ket maysa a babai ken naasawaan.
Basar iti report, inbitin ti biktima ti bukod na a bagi iti uneg ti balayda gapu iti depresyon.
Naamoan a daytoyen ti maikadwa a gundaway a ginandat ti biktima ti agpakamatay no sadinno nga immuna nga inaramid na daytoy ket idi Hulyo iti napalabas a tawen.
Ti maikadwa a suicide incident ket napasamak met iti ili ti Pasuquin no sadinno a ti biktima ket maysa a lalaki, agtawen ti 72, mannalon.
Iti report iti Philippine National Police iti ili ti Pasuquin, inbitin ti nasao a biktima ti bagi iti kayo ti alukon.
Kabayatanna, napasamak met ti maikatlo a suicide incident iti ili ti Paoay a ti biktima ket agtawen ti 55, lalaki ken hollow block maker no sadinno nga inbitin na ti bagina iti kayo ti salaysalay.
Inbatad ti Philippine National Police nga amin dagiti nairekord a suicide incidents iti probinsya ket awan ti foul play no di ket gapu iti depresyon.
Inpasingked ti Ilocos Norte Police Provincial Office nga ad-adda pay a paigetan da ti koordinasyon da kadagiti Local Government Units kangrunaan na iti Department of Social Welfare and Development tapno maliklikan dagiti kastoy a pasamak.
