LAOAG CITY – Nagsagaba ti sugat iti nagduduma a paset ti bagi dagiti tallo nga indibidual iti panagdinnungpar ti motorsiklo ken trycicle iti Paoay-Balacad Road, bisinidad ti Barangay Nagbacalan iti ili ti Paoay.
Nabigbig ti driver ti tricycle a ni Mr. Rogerick Tapec, agtawen ti 45 ken residente iti Barangay Nagbacalan iti ili ti Paoay idinto a ti driver ti motorsiklo ket agtawen ti 15 ken ti lubbon na nga agtawen ti 13, agpada a residente iti Barangay Suba iti nadakamat nga ili.
Iti imbestigasyon dagiti otoridad, agsarsaruno nga agpabagatan a direksyon ti tricycle ken motorsiklo idi bimmangir a paset ti kalsada ti tricycle tapno agparking idinto a ti motorsiklo ket rumrumuar a nagderetso a nangitunda ti desgrasya.
Gapo iti daytoy, natukkol ti akin-kannigid nga ima, gasgas iti nagduduma a paset ti bagi ken nadugulan ni Tapec idinto a ti driver ti motorsiklo ken natukkol ti akin-kannawan a luppo na ken ti inlubbon na ket natukkol ti ramay iti akin-kannawan a saka na.
Dagus met a naitaray dagiti biktima iti ospital para iti pannakataming da.
