LAOAG CITY – Inpakaammo ni Dr. Alan Taylan, ti St. Camillus De Lellis Hospital ditoy siudad ti Laoag nga arig ti maysa a tao nga heartbroken ket kapadana ti maysa a pasiente a makapaspasar ti sakit iti puso.
Segun kenkuana, daytoy ket kalpasan nga adda dagiti sintomas ti maysa a pasiente a makapaspasar ti sakit iti puso a marikrikna met ti maysa nga indibidual nga heartbroken.
Inlawlawagna nga adda ti medical term a maaw-awagan a broken heart syndrome a maysa a kondision a kumapsot ti lasag iti puso ti maysa a tao kalpasan iti emosional nga stress.
Kunana a mabalin daytoy a maala no ti maysa nga indibidual ket adda ti sakit ti nakemna, adu unay ti panpanunotenna, saan a makaturog a nasayaat ken dadduma pay.
Innayonna a saan met a permanente a sakit ti broken heart syndrome gapu ta mabalin daytoy a maagasan apaman a maikkat ti sakit ti nakem ti maysa nga indibidual.
