LAOAG CITY – Adda ti fish kill kadagiti taraken a lames iti fish cages dagiti residente iti Barangay Caaocan ditoy siudad ti Laoag gapu iti maipagarup nga oil contamination iti karayan.
Segun ken ni Brgy. Chairman Adel Boy Quinto iti nasao a barangay, nangrugi nga adda dagiti matmatay a lames idi limabas ti super typhoon Betty ditoy probinsya.
Kuna na nga iti pakaammo kenkuana dagiti kabarayanggayanna nga agtartaraken ti lames iti karayan, arig nga adda ti nailaok a nalanit wenno langis iti danom.
Inpakaammo na a maysa agingga iti sangapulo a lames ti matmatay iti kada aldaw manipod iti tunggal fish cage.
Mainaig iti daytoy, inbatad ni Ms. Mylene Pascual, mangidadaulo ti City Environment and Natural Resources Office ditoy probinsya nga addan ti naala a water sampling ken maiyur-uray ti resulta ti testing iti daytoy manipod iti laboratoryo idiay Pampanga.
Kuna na a babaen iti daytoy ket maamoan ti content ti langis a makaap-apektar ti karayan iti nasao a barangay.
Inpakaammo ni Pascual nga addan ti panagtataripnong dagiti barangay captains para iti master listing dagiti negosyo, establisyimento, terminal ti luglugan ken dadduma pay a posible nga agus-usar ti langis.
Innayun na a napateg daytoy nga addang tapno maamoan nu adda dagiti agibelbelleng ti hazardous liquid waste iti pagayusan ti danom nga agkamang iti nagduduma a karayan ditoy siudad.
Malaksid iti daytoy, inbatad ni Pascual a maaramid pay ti information dissemination ken pannakadalus ti apektado a karayan tapno saan a kumaro ti sitwasyon bayat a maiyur-uray ti resulta ti water sample testing.
Naamoan a ti karayan iti Brgy. Caaocan ket isu ti catch basin iti intero a Laoag City.
