LAOAG CITY – Simmangpeten ni Ukrainian President Volodymyr Zelensky iti Downing Street para iti panagsinnarita mainaig iti Ukraine peace plan.
Kadua ni Zelensky iti panagsinnarita da Prime Minister Keir Starmer, French President Emmanuel Macron ken German Chancellor Friedrich Merz.
Pagsaritaan dagiti lider ti kaudian nga Ukraine peace plan a naudi idi adda ti panagsinnarita iti nagbaetan ti Ukrainian ken United States officials iti Florida iti napalabas a lawas.
Inpasingked ni United States President Donald Trump a kayat dagiti negotiator ni Zelensky ti kabaroan a plano.
Nupay kasta, inbatadna nga adda ti bassit a pannakadismayana ken ni Zelensky gapu ta saanna pay a nabasa ti proposal.
Inlawlawag met ni Zelensky a dagiti sumagmamano nga isyu ket masapul a matalantan nga agsasangoda.
Kabayatanna, agtultuloy ti panangatake ti Russia idiay Ukraine nga adda ti pito a nasugatan iti south-eastern Ukrainian iti siudad ti Zaporizhzhia.
