LAOAG CITY – Umabot iti agarop 11 ribo a kameng ti Philippine National Police ti maiwaras tapno maipasigurado ti seguridad iti pannakaisayangkat ti maikatlo a Trillion Peso March, ti protesta kontra iti flood control corruption, intono Pebrero 25, kagiddan ti anibersaryo ti EDSA People Power Revolution.
Iti press briefing, Inpasingked ni Philippine National Police spokesperson Police Brigadier General Randulf Tuaño a ti pwersa da ket naan-anay a nakasagana tapno maipasigurado nga amin dagiti maisayangkat iti dayta nga aldaw ket naurnus ken natalna.
Immunan a nangisyu ti gobierno lokal iti Quezon City ti memorandum a napetsaan ti Pebrero 10 a naiturong iti Quezon City Police District tapno ipakaammo nga adda ti naestablisar da a lima nga organisasyon a makipaset iti dua nga aldaw nga aktibidad nga indiskribir da kas “prayer and indignation rally”.
Inpakaammo pay ni Tuaño a dagiti aktibidad ket naka-schedule intono Pebrero 22 ken 25 iti EDSA Shrine ken People Power Monument, no sadinno a mapatta-patta nga umabot iti agarop 50,000 nga indibidual ti makipartisipar.
Inpasigurado met ti nailian a pulisya nga awan pay ti namonitor da a pangta mainaig iti maisayangkat a protesta intono Pebrero 25, 2026.
