LAOAG CITY – Siraragsak ni Gob. Matthew Marcos Manotoc a nangipakaammo nga umabot iti pito gasut a milyon a pisos ti dagup ti inpaay dagiti sumagmamano nga agpanpanday linteg a nayon a pundo para iti transportation hub ti Ilocos Norte.
Inpadanonna ti napalaos a panagyamanna kadagiti maseknan a nangipaay ti suportada para iti pannakaipasigurado a makumpleto ti nasao a proyekto.
Inlawlawag ti Gobernador a nagbirok a dagus ti mainayon a pundo kalpasan nga inrakurak ni Architect Felino Palafox nga umabot iti maysa a bilyon a pisos ti kasapulan a pundo para iti pannakakumpleto ti proyekto.
Mainaig iti daytoy, mangnamnama ni Gob. Manotoc a makita ti panagbanag ti nasao a proyekto.
Segun kenkuana, makibinnulig ti gobierno probinsial ti Ilocos Norte iti contractor tapno maipasigurado a matun-uyan ti sirmata ni Palafox a pagbalinan ti transportation hub nga addaan ti rooftop garden, commercial space ken ti sibubukel a development area.
Namnamaen ti Gobernador a daytoy a proyekto ti manglukat iti ad-adda pay a panagdur-as ti probinsia a dakkel a tulong kadagiti amin nga umili ditoy Ilocos Norte.
