LAOAG CITY – Mapatta-patta nga umabot iti dua a milyon a tattao ti maapektaran ti panagbiag na iti panangisardeng ti Estados Unidos ti ipapaay na nga humanitarian assistance idiay Sudan.
Gapu iti daytoy ket napilitan met a nagserra ti agarop 80 a porsiento ti emergency food kitchens a tumultulong a mangipaay ti taraon para kadagiti naruay a tattao a naapektaran ti civil war iti nadakamat a pagilian.
Inbatad dagiti aid volunteers a ti impact executive order ni US President Donald Trump mainaig iti panangisardeng ti Amerika a mangipaay ti pondo manipod iti US government’s development organisation (USAID) iti uneg ti 90 nga aldaw ket kaipapanan ti panagserra ti nasurok a 1,100 communal kitchens.
Kabayatanna, gapu iti mapaspasamak a riribok iti nagbaetan dagiti tropa ti Sudan ken Paramilitary Rapid Support Forces ket umaboten iti rinibo a tattao ti natay ken minilyon a residente ti napilitan a nagbakwit sipud idi Abril 2023.
Ti emergency food kitchens ket patpatarayen ti sumagmamano a grupo a maaw-awagan ti emergency response rooms nga agresresponde iti mapaspasamak a krisis kadagiti kaparanget da a pagilian.
