LAOAG CITY – Pimmusay ni ABC President Mark Adrian “Macky” Barba pakairamanan dagiti dua a bodyguard-na kalpasan a pinaltu-paltogan dagiti saan pay a nabigbig a suspek iti sango ti Pamulinawen Hotel iti Brgy. 22 iti ili ti San Nicolas.
Nabigbig dagiti dua a bodyguard nga isuda Lord Wayne Bautista Menor, agtawen iti 26, awanan asawa, residente ti Brgy. 12 San Cayetano iti ili ti San Nicolas ken ni Raffy Agraan Ulep, agtawen iti 39 ken residente ti Brgy. 6 San Juan Bautista iti nasao met laeng nga ili.
Basar iti San Nicolas Municipal Police Station, kabayatan a nakalugan dagiti biktima iti Toyota Innova nga agmaris ti dapo nga inturong ni Menor nga agpa-amianan ket kellaat nga adda ti nangpaltu-paltog kadakuada ti sumagmamano a daras.
Gapu iti daytoy, napukawan ti kontrol ti manibela ti driver agingga a naidungpar daytoy iti naka-parking a Toyota Fortuner.
Nagsagaba dagiti biktima ti tama ti bala ti paltog iti nagduduma a paset ti bagida pakairamanan ti ulo dagitoy a nangitunda ti pannakatayda.
Naammoan a ni ABC President Barba ken ti maysa kadagiti bodyguard-na a ni Ulep ket agpada dagitoy a dead on arrival idinto a pimmusay ni Menor kabayatan a matamtaming iti ospital.
Kabayatanna, rumrummuar a dumanon iti sumurok 40 a kapsula ti bala ti paltog ti narekobre iti crime scene.
