LAOAG CITY – Dumanon iti maysa nga ektaria ti naapektaran iti napasamak a grass fire iti paset ti Barangay 16 ditoy siudad ti Laoag.
Basar iti Bureau of Fire Protection, alisto a nagramram ti apoy gapu ta napigsa ti angin iti nadakamat a lugar.
Narigatan dagiti bumbero a nangsebseb ti apoy gapu ta saan a makadanon ti hose ken napuskol ti asok.
Adda ti tallo a fire truck ti nagtitinnulong tapno masebseban ti apoy kas ti Bureau of Fire Protection manipud ditoy siudad ti Laoag pakairamanan iti ili ti San Nicolas ken Bacarra.
Naiget a binantayan ti Bureau of Fire Protection ti grass fire nangruna ket sumagmamano laeng a metro iti kaadayona iti peryaan.
Naammoan a nagpaot ti uram iti las-ud ti tallo nga oras no sadinno a naideklarar a fire out iti agarup alas singko idi malem kalman.
Iti agdama, agtultuloy ti imbestigasion dagiti otoridad no asino ti adda iti likudan ti insidente.
