LAOAG CITY – Agtultuloy ti imbestigasyon dagiti kameng ti PNP-Laoag mainaig iti pannakapaltog ti maysa a provincial security guard kabayatan a nakaduty iti Provincial Engineering Office iti Barangay 7-B idi rabii.
Nabigbig ti biktima a ni Roderick Ramos Manuel, agtawen ti 49, naasawaan ken residente iti Barangay 53, Rioeng ditoy ciudad.
Segun kenni Police Lt. Col. Amador Quicho, ti chief of police ti PNP-Laoag, nailet laeng ti guardhouse a pagigianan dagiti maseknan isut gapu na a posible nga inranta ti saan pay nabigbig a suspek ti nasao nga insidente.
Ummunan a naimbitaran ti gwardya a nakaduty met laeng a ni Provincial Security Guard Theodoro Agbayani Herbacio, 54, awanan ti asawa ken residente iti Barangay 3, San Pedro iti ili ti Vintar, ken dumalan iti ballistic examination ti paltog na.
Kabayatanna, maluksaw ni Quicho gapo ta idi napan da nagimbestigar iti nakapasamakan ti insidente ket naduktalan da a perdi ti CCTV cameras iti aglawlaw .
Maipalagip a narekobre ti maysa a basyo ti 9MM ngem saan da pay a nakumpimaran nu anya a klase a paltog ti timmama iti teltel ti biktima.
