LAOAG CITY – Maisagsaganan ti reklamo nga Usurpation of Authority ken Estafa a maipila kontra ken ni Shiela Orata Diaz, agtawen ti 36, residente iti Barangay 23 ditoy cudad ti Laoag.
Natiliw ni Diaz iti naiyuswat nga entrapment operation babaen kadagiti kameng ti PNP iti Barangay 12 ditoy ciudad gapu iti panagiproseso wenno panagaramid na ti peke a driver’s license.
Segun ken ni Police Major Carlo Abing, ti deputy chief of police ditoy ciudad ti Laoag, kalpasan a natiliw ni Diaz ket inpresentar da a dagus ken ni Provincial Director Police Col. Julius Suriben.
Maragsakan ni Suriben gapu iti pannakatiliw ni Diaz ken inkari na a mangiyuswat da ti naun-uneg nga imbestigasyon gapu ta mamati nga adda ti kakunsabo ti suspek nga agar-aramid kadagiti peke a driver’s license ditoy probinsya.
Iti agdama, nagtalinaed ti suspek iti kustodyar ti Ilocos Norte Police Provincial Office (INPPO) ngem manamnama a maiyakar iti PNP-Laoag nga isu ti mangipila ti reklamo nga Usurpation of Authority ken Estafa kontra kenkuana.
Immun-una ngem iti daytoy, inbatad ni Jessie Tolentino, barangay official iti Barangay 2 iti ili ti Carasi a nagpailakad ti asawa na iti lisensya kenni Diaz ngem atapen da nga iligal ken napaneknekan da a peke daytoy.
Gapo iti daytoy, nagukkon da ti ebidensya ken inreport da iti PNP.
Kunana nga umabot iti nasurok uppat a ribo ti inisyal a bayad para iti pannakaiproseso ti lisensya ngem peke daytoy.
Inbatad na nga ado pay dagiti biktima ni Diaz iti lugar da.
Desidido ni Tolentino a mangipila ti reklamo kontra iti suspek.
Nakumpiskar met dagiti otoridad ti 4,000 pesos kas marked money ken tallo a driver’s license.
Mainaig iti daytoy, kuna met ti maysa kadagiti kameng ti LTO a ni Mr. Anthony Pascua nga iti kallabes ket adda ti nagreklamo kadakuada seknan iti lisensya na.
Gapo iti daytoy, nagballaag ni Pascua iti publiko a saan a mamati kadagiti agididiaya ti lisensya babaen iti social media ken dadduma pay a wagas.
Kabayatanna, nagkedked a nangipaay ti komento ni Diaz ken saanna pulos a kinayat ti nagpainterview kadagiti kameng ti media.
