LAOAG CITY – Inpakaammo ni Fire Senior Inspector Edison Reyes, City Fire Marshal ti Bureau of Fire Protection ditoy siudad ti Laoag nga agtultuloy ti imbestigasionda mainaig iti pannakauram ti maysa a pagtaengan iti Barangay 1, San Lorenzo ditoy siudad.
Segun kenkuana, adda ti tallo a kuarto ti naminpinsan a nauram iti maikadua a kadsaaran ti pagtaengan no sadinno a nangrugi ti uram ti maysa kadagitoy agingga a nairamraman dagiti dadduma a kuarto.
Inbatadna nga awan ti tao iti maitudtudo a kuarto a nagrugian ti uram idi napasamak ti insidente.
Inlawlawagna a manarimaan pay laeng ti panangimbestigarda no ania ti pudno a namunganayan ti uram kasta pay ti balor ti pannakadadael ti pagtaengan.
Maipalagip nga inpakaammo ni Barangay Chairman Manny Morales iti nasao a barangay, nabigbig ti akinkukua ti nauram a pagtaengan a ni Mr. Federico Aquino Jr. no sadinno nga apaman a nakadanonda iti lugar ket dakkelen ti apoy ken alisto a nagramram daytoy gapu ta naaramid laeng ti light materials ken daanen ti pagtaengan.
