LAOAG CITY – Inpasingked ni Miss Jann Lee Cacactin a saan nga agin-inom ti kabsat na a biktima ti pammaltog a ni Jimuel Cacactin iti Barangay Cali iti ili ti Dingras.
Inbatad na a ti kabsat na ket adda ti sakit na iti puso ket agtumtumar ti agas.
Kuna na pay nga awan ti bisyo ti kabsat na kangrunaan na ti uminom ti arak gapu ta makapadakes kenkuana.
Inlawlawag na pay a nabayag dan a kasarsarita nga agsardengen nga agtrabaho kas security guard iti maysa a warehouse iti nasao nga ili gapu iti sakit na.
Nupay kasta, inkalintegan ti biktima nga agtrabaho latta tapno mailiwliwag na ti sagsagabaen na a sakit.
Immuna iti daytoy, iti inisyal nga imbestigasyon ti PNP-Dingras, iti ala-una ti parbangon idi kalman ket naggi-inum ti biktima, suspek a ni Vincent Reyes y Lazo, pahinante iti truck ken residente iti Barangay Imelda iti ili ti Marcos ken dagiti katrabahoan da iti mismo a bodega idi adda ti saan a pinagkinnaawatan dagiti dua.
Gapo iti daytoy, inasot ni Reyes ti paltog na ken pinaltogan na ti muging ni Cacactin a nangitunda ti pannakatay na.
Natiliw ti suspek iti mismo a pagtaengan da ken nakumpiskar da kenkuana ti kalibre 38 a paltog a nausar iti krimen.
