LAOAG CITY – Umaboten iti 22 ti bilang dagiti kumpirmado a nasugatan wenno nadangran gapu iti nagduduma a klase ti paputok ditoy probinsya iti panangsarabo ti baro a tawen 2025.
Daytoy ti inpakaammo ni Dr. Rickson Balalio, ti mangidadaulo iti Provincial Health Office iti kapitolyo probinsyal.
Basar iti datos manipod iti Provincial Health Office, karaman kadagiti nagbalin a biktima ti paputok ket manipod iti ili ti Banna, Piddig, Pinili, Dingras, Bacarra, San Nicolas ken ditoy ciudad ti Laoag.
Mainaig iti daytoy, nagtalinaed a ti agtawen ti walo a lalaki manipud iti ili ti Bacarra ti kaubingan a biktima kalpasan a napaputukan ti Luces, idinto nga agtawen ti 42 a babai manipod iti ili ti Dingras ti kataengan a nasugatan met gapu iti roman candle fountain.
