LAOAG CITY – Napilaanen ti kaso a frustrated murder ni Mr. Edcel Joshua Corpuz y Foronda, agtawen ti 22, baro, construction worker ken residente iti Barangay Saludares iti ili ti Dingras.
Daytoy ket gapu iti panangbagkong na ken ni Leonard Vicente y Ostanio, agtawen 31, awanan ti asawa, mannalon ken residente met laeng iti nasao a barangay.
Immun-una iti daytoy, adda iti pasken nga inatendaran dagiti maseknan ket dita a naggi-inom da ken adda ti nagbalin a nabara a diskusyon iti nagbaetan da Vicente kenni Corpuz.
Iti ipapanaw kuman ti biktima ket kinamat ti suspek ken ditoyen a binagkong na a nagsagabaan ni Vicente ti sugat iti bakrang na.
Dagus a naitaray ti biktima iti Dingras District Hospital para iti pananakatameng na ngem naiyakar iti Mariano Marcos Memorial Hospital and Medical Center iti siudad ti Batac.
Iti agdama, nagtalinaed iti kustodyar ti PNP Dingras ti suspek.
