LAOAG CITY – Kinumpirmaran ni Police Staff Sergeant Dennis Esteban, imbestigador iti PNP-Sarrat nga addan iti natalged a kasasaad ti lakay a nadungpar ti motorsiklo iti paset ti Barangay 1 iti nasao nga ili.
Nabigbig daytoy a ni Pilesisimo Macni, 72, residente iti nasao a barangay idinto a ti nakadungpar ket ni Kevin Igne, 25, security guard iti maysa a convenience store ken residente iti Brgy. Capasan iti ili ti Dingras.
Nupay kasta, kuna ni Esteban a kasapulan ti tulong ti biktima para iti idadalan na ti x-ray ken para iti naan-anay a pannakataming na.
Maipalagip a bayat nga agpapalaud a direksyon ti motorsiklo nga inturong ni Igne ket nadungpar na ti lakay a bimmalasiw iti kalsada.
Naamoan a maipagarup a nakainom ti nasanger ti biktima.
Gapu iti daytoy, na-dislocate ti akin-kannawan a palay-palay ti lakay ken ang-angalan met ni Igne ti barukong na rason a naitaray dagitoy iti ospital.
