LAOAG CITY – Nabirukan nga agruprusan a bangkay ti lalaki nga immunan a naireport a nagpukaw iti ili ti Solsona, addan sumagmamano a lawas ti napalabas.
Nabigbig daytoy a ni Roel Gallegos, agtawen ti 41, naasawaan ken residente iti Barangay Manalpac iti nasao nga ili.
Immunan a naireport a nagpakada ti biktima iti ina na a mapan idiay Butao, Apayao tapno dalusan na ti pagmulaan na ti pagay babaen ti panaglugan na ti binulod na a motorsiklo.
Narekobre ti agruprupsan a bangkay ni Gallegos iti derraas iti Apayao Road.
Inlawlawag ni Police Capt. Chris Anthony Sorsano, ti chief of police iti ili ti Solsona, nagreport kadakuada ti kapitana iti Barangay Manalpac nga adda ti nangitawag kenkuana nga adda ti nabangsit nga angot iti lugar ken adda pay ti nakita a motorsiklo iti derraas.
Nagresponde a dagus dagiti kameng ti pulisya ket ditoy a nakita da nga adda ti agruprupsan a bangkay iti derraas nga addaan ti kauneg nga agarop 30 a metro.
Inbatad ni Sorsano nga inyaban da ti ina ti biktima tapno kumpirmaren na no daytoy ti mapukpukaw nga anak da.
Positibo met a binigbig ti ina ni Gallegos a daytoy ti nagpukaw nga anak na.
Agtultuloy ti imbestigasyon dagiti otoridad tapno maamoan no ania ti pudno a napasamak.
