LAOAG CITY – Awan pay ti pamal-palatpatan ti Philippine National Police (PNP) iti lokasyon dagiti akusado iti pannakatambang ti grupo ni Vice Mayor Maja Sales iti Pagudpud, Ilocos Norte idi 2010.
Daytoy ti inbatad ni Police Capt. Edwardo Santos, ti chief of police iti ili ti Pagudpud.
Nabigbig dagiti akusado nga isuda Rex Benemerito, Rogelio Benemerito Jr. alyas Keneth, Roland Benemerito alyas Puraw, Roldan Curammeng alyas Tottiy, Restituto Jadulcot alyas Ranger, ken ni Julian Manegdeg.
Segun ken ni Santos, sipud naawat da ti warrant of arrest kontra kadagiti akusado ket minonitor da a dagus ti lokasyon dagiti maseknan.
Innayon na nga iti pannakisarsarita da kadagiti kabagyan dagiti akusado ket inpakaammo da kadakuada nga uray isuda ket saandan a matawagan dagiti maseknan.
Inadmitir ni Santos a ti maysa kadagiti akusado a ni Rex Benemerito ket nabayagen a saanna a nakita idinto a ni alyas Keneth ket nakita na laeng iti nabiit iti nasao nga ili idinto a dagiti dadduma nga akusado ket saanna nga am-ammo.
Patien ni Santos a natunugan dagiti akusado ti pannakaiparuk-at ti warrant of arrest kontra kadakuada.
