LAOAG CITY – Inbatad ni Police Capt. Chris Anthony Sorsano, ti chief of police iti ili ti Solsona nga adda ti dua a sursuruten da a possible a motibo iti pannakapaltu-paltog a poon ti nakatayan ni Eugenio Balantac Jr., agtawen 54, maysa a mannalon ken jeepney operator, ken residente iti Barangay Juan iti nasao nga ili.
Inbaga na a dagiti dua a kitkitaen da a motibo ket ti love triangle ken riri iti talon.
Nupay kasta, saan pay laeng a makaipaay ni Sorsano ti naan-anay nga impormasyon gapu ta manarimaan pay laeng ti imbestigasyon da.
Segun ken ni Sorsano, adda payen ti atapen ti pamilya ti biktima a suspek iti krimen ngem masapol nga imbestigaren da a naimbag daytoy ken saanda a mabalin nga ipublikar ti kinatao na gapu ta awan pay ti ebidensya da.
Inpakaammo pay ni Sorsano a basar kadagiti kabagyan ti biktima ket addan dagiti naaw-awat ni Balantac a pangta iti biagna ngem saanda a napan inrepreport iti kwerpo ti pulisya.
Maipalagip a kabayatan ti panagawid ti biktima a nakalugan ti tractor ket tinambang dagiti saan pay a nabigbig a suspek iti paset ti Barangay Santiago iti nasao nga ili.
