LAOAG CITY – Inbatad ni Police Capt. Chris Anthony Sorsano, ti chief of police iti ili ti Solsona a saan da pay a naipila ti reklamo kontra kenni Sang Bayan member Nomer Agulay iti nasao nga ili.
Inlawlawag ni Sorsano nga apaman a makompleto dagiti kasapulan da a dokumento ket ipila danton a dagus ti reklamo kontra iti nasao a konsehal.
Innayon na a para kenkuana ket umdas dagiti ebidensya nga iggem da kontra ken ni Konsehal Agulay ngem makaammon ton ti piskalya a mangdesisyon iti ipila da a reklamo babaen ti regular filing.
Segun kenni Sorsano, nakasarita nan ni Agulay ket inbaga na a bilin a mismo ti ngato ti panangipila da ti reklamo isut gapuna a sungbatan nanto lattan daytoy.
Inadmitir ni Sorsano nga idi nabasa na ti komento ni Agulay kontra kadakuada a kameng ti nailian a pulisya ket nakigtot, nasaktan ken nainsulto, saan laeng nga isuna no di ket iti sibubukel a PNP iti intero a pagilyan.
Kuna pay ni Sorsano nga awan ti gura na ken ni Agulay ngem ar-aramiden na laeng ti trabaho da.
Maipalagip nga ado dagiti nangbabalaw ken ni Agulay gapu iti nagbalin a komento na iti facebook post na nga arigna ilunlunod na dagiti kameng ti pulisya nga agisaysayangkat ti checkpoints.
Iti komento ni Agulay iti mismo a post na iti facebook, inbaga na ti “isuda koma ngarud ti umuna a maakaran’, a kayat na a sawen ket dagiti koma kameng ti pulisya ti umuna a maakaran ti coronavirus.
Nagpadespensar metten ni Agulay iti nagbalin a komento na kontra iti PNP babaen iti panagpost na iti facebook account na.
