LAOAG CITY – Inrakurak ni Dr. Julius Manzano Jr., ti Presidente iti Mariano Marcos State University a kalikagom ti administrasyon na nga amwen ti kinapudno pakaseknan dagiti reklamo a maibatbato ken ni Dr. James Zandro Ventura III.
Kunana na a daytoy ti aramiden da tapno maamoan ti kinapudno, saan ketdi a kanunungan ti maseknan.
Segun kenkuana, kalpasan a naawat da ti formal complaints ket nakitaripnong nga insigida iti legal team ti nasao nga unibersidad, ken inpasigurado na a kalpasan ti 15 nga aldaw ket addan ton ti ipaay da a resulta ti nagbalin a duktal da ken no adda ti maipataw a formal charge para ken ni Ventura.
Nagpanawagan met ni Manzano iti publiko nga aguray laeng iti resulta ti imbestigasyon da gapu ta saan a kaskarina ti agimbestigar a kas met ti maar-aramid iti korte.
Nupay kasta, inpasigurado na nga awan ti mapasamak a bias treatment kabayatan ti proseso a kas napasamak iti kallabes a kaso pakaseknan iti maysa metlaeng a mangisursuro a dimmalan iti naikaipalaon ti protocol ti unibersidad.
Inbatad na a maysa a professor ti napatawanen ti pannusa babaen iti propesyonal a wagas ken awanan ti pre-disposition dagiti dadduma nga indibidwal.
Kabayatanna, inpetteng ni Dr. Manzano a saan da a mabalin ti mangiparuk-at ti suspension order kontra ken ni Ventura agingga nga awan ti makaumanay a pagibasaran.
Inpakaammo na a basar iti impormasyon ti legal team ti unibersidad ket adda ti maisayangkat a clarificatory hearing ita nga aldaw, Hunyo 10 karaman dagiti complainants ken dagiti testigo.
Innayon na a kiniddaw da metten iti nasao a mangisursuro a mangisumitir ti counter affidavit na kalpasan ti clarificatory hearing gapo ta adda ti kurang a sertipikasyon a saan nga inpasa dagiti complainants.
Kunana a kalpasan dagitoy ket mabalinen a mangiparuk at ti rekomendasyon ti Committee on Decorum and Investigation ti unibersidad.
